Nr. 952 16. desember 2002
REGLUR
um framhaldsnám við heimspekideild Háskóla Íslands.
I. KAFLI
Almennt.
1. gr.
Námsleiðir.
Við heimspekideild Háskóla Íslands er hægt að stunda framhaldsnám til M.Paed.-prófs, M.A.-prófs og doktorsprófs á fagsviðum þar sem skor og deildarráð meta að nauðsynleg aðstaða og sérþekking sé fyrir hendi.
2. gr.
Umsóknarfrestur.
Umsóknarfrestur er til 15. febrúar, sé ætlunin að hefja nám að hausti, en til 15. septem-ber, ætli nemandi að hefja nám á vormisseri.
Öllum umsóknum um framhaldsnám við heimspekideild skal skilað til skrifstofu heimspekideildar. Nánari ákvæði um meðferð umsókna og efni er að finna í sérreglum um einstakar námsleiðir (M.Paed.-nám, M.A.-nám, doktorsnám).
3. gr.
Almenn umsjón, upplýsingar og aðstaða til framhaldsnáms.
Skrifstofa heimspekideildar heldur námsferilsskýrslu fyrir alla framhaldsnema í heimspekideild, fylgist með framvindu náms þeirra og veitir upplýsingar um nám og námsskipunarreglur. Hugvísindastofnun Háskóla Íslands hefur umsjón með vinnuaðstöðu framhaldsnema og ber að sækja um slíka aðstöðu til stofnunarinnar.
Skrifstofa heimspekideildar aðstoðar framhaldsnema við umsóknir um styrki, rannsóknavinnu, aðstoðarkennslu og þess háttar, í samvinnu við skrifstofu rannsóknasviðs Háskólans og leiðbeinendur framhaldsnema.
4. gr.
Rannsóknanámsnefnd.
Vísindanefnd heimspekideildar gegnir hlutverki rannsóknanámsnefndar deildarinnar. Nefndin fylgist með því að hæfilegs samræmis sé gætt í meðferð umsókna um meistara- og doktorsnám, sem og skipulagi framhaldsnáms, inntökuskilyrðum og kröfum til nemenda. Vísindanefnd ræðir og mótar stefnu deildarinnar um framhaldsnámið eftir því sem deild felur henni. Hún skal fjalla um gæði þessa náms og gera tillögur til deildarráðs um það hvernig rétt sé að meta það og styrkja.
5. gr.
Aðalleiðbeinandi.
Sérhver framhaldsnemi skal hafa aðalleiðbeinanda úr hópi fastra kennara (lektor, dósent, prófessor) í viðkomandi grein, sem er jafnframt umsjónarkennari hans. Skor getur veitt undanþágu frá þessari reglu en aðalleiðbeinendur meistaranema skulu ávallt vera viðurkenndir sérfræðingar á viðkomandi sviði. Ef aðalleiðbeinandi er ekki fastráðinn kennari er nauðsynlegt að hann hafi sjálfur a.m.k. lokið meistaraprófi á fræðasviðinu.
Við upphaf náms skulu skor og framhaldsnemi hafa samráð um val á aðalleiðbeinanda. Nemandi ráðfærir sig við aðalleiðbeinanda um skipulag námsins, val námskeiða og annað sem tengist náminu. Aðalleiðbeinandi leiðbeinir stúdent í lokaverkefni.
II. KAFLI
Meistaranám fyrir kennara (M.Paed.).
6. gr.
Markmið.
Markmið M.Paed.-náms er að búa nemendur undir rannsóknir, kennslu og námsstjórn í kennslugrein á framhaldsskólastigi.
7. gr.
Tilhögun námsins.
Námið er skipulagt í samvinnu við félagsvísindadeild sem sér um námskeið í uppeldis- og kennslufræðum og eftir atvikum í samvinnu við aðrar deildir háskólans, aðra háskóla eða rannsóknastofnanir.
Hver kennslugrein tilnefnir einn umsjónarmann með M.Paed.-náminu, sem skipuleggur námið í umboði sinnar kennslugreinar. Umsjónarmenn mynda kennslunefnd námsins. Nefndin kýs tvo kennara úr sínum röðum sem forsvarsmenn þess til eins árs í senn. Hlutverk þeirra er m.a. að hafa með höndum kynningu fyrir nýja nemendur, boða fundi kennslunefndar og stuðla að kynningu út á við.
8. gr.
Meðferð umsókna.
Umsóknum skal skilað til skrifstofu heimspekideildar. Umsókn skulu fylgja afrit af próf-skírteinum og stutt greinargerð um markmið nemanda með náminu. Nám í uppeldis- og kennslufræðum í félagsvísindadeild er hluti náms til M.Paed.-prófs, en skrifstofa heimspekideildar sér um skráningu nemenda í það nám.
Deildarskrifstofa fer yfir og skráir umsóknir, athugar hvort tilskilin gögn fylgja og gengur eftir því sem á vantar. Umsóknirnar fara síðan til afgreiðslu í viðkomandi skor, með athugasemdum ef ástæða þykir til. Skor getur lagt til að umsókn sé hafnað. Sé það gert skal rökstuðningur fylgja.
Deildarskrifstofa tilkynnir umsækjendum um niðurstöður skora og sendir Hugvísindastofnun og nemendaskrá upplýsingar um nýja framhaldsnema. Deildarskrifstofa varðveitir og heldur utan um öll námsferilsgögn framhaldsnema.
Afgreiðslu umsókna sem berast fyrir 15. febrúar (vegna innritunar á haustmisseri) skal vera lokið og þeim svarað fyrir 15. mars. Afgreiðslu umsókna sem berast fyrir 15. september (vegna innritunar á vormisseri) skal vera lokið og þeim svarað fyrir 15. október.
9. gr.
Inntökuskilyrði.
Stúdent sem lokið hefur B.A.-prófi með fyrstu einkunn frá viðurkenndum háskóla getur sótt um að innritast í nám til M.Paed.-prófs. Skorir geta veitt undanþágu frá kröfum um lágmarkseinkunn. Að jafnaði skal stúdent hafa lokið minnst 60e (einingum) á B.A.-stigi í þeirri grein sem hann hyggst innritast í til M.Paed.-prófs. Kennarar með B.Ed.-próf og tungumál sem valgrein geta hafið M.Paed.-nám að uppfylltum ákveðnum skilyrðum. Um nánari skilyrði vísast til námsskipunarreglna einstakra greina.
Ef stúdent ætlar að hefja meistaranám strax að loknu B.A.-prófi getur hann sótt um það áður en hann lýkur prófi, ef fyrir liggur staðfesting viðkomandi háskóladeildar um að hann muni væntanlega ljúka prófi með fullnægjandi árangri áður en meistaranámið hefst. Engum áfanga í meistaranámi má ljúka fyrr en inntökuskilyrðum hefur verið fullnægt til hlítar.
10. gr.
Einingafjöldi og tímalengd náms.
Nám til M.Paed.-prófs er 45e hið minnsta og skulu minnst 15e vera úr námskeiðum sem félagsvísindadeild skipuleggur eða viðurkennir í uppeldis- og kennslufræðum til kennsluréttinda og 20e að jafnaði úr fræðilegum námskeiðum í kennslugreininni sem sérstaklega eru ætluð verðandi kennurum eða þykja henta vel sem undirbúningur undir kennslu í framhaldsskólum. Lokaverkefnið er 15e, sbr. 11. gr. Náminu má ljúka á einu og hálfu til tveimur árum en að jafnaði skal það ekki taka lengri tíma en þrjú og hálft ár (sjö misseri). Ljúki nemandi ekki námi á sjö misserum getur hann sótt um undanþágu til skorar frá þessum tímamörkum. Sé undanþága veitt, ber nemanda að uppfylla þær kröfur sem þá eru í gildi um M.Paed.-nám þótt hann hafi hafið námið meðan aðrar reglur giltu. Skor er heimilt að veita undanþágu frá þessu.
11. gr.
Lokaverkefni og meistaraprófsnefnd.
Nemendur skulu ljúka 15e lokaverkefni. Lokaverkefni skal valið í samráði við aðalleiðbeinanda. Ekki síðar en í upphafi þriðja námsmisseris skipar skor meistaraprófsnefnd. Í henni skulu eiga sæti minnst tveir sérfróðir menn og er annar þeirra aðalleiðbeinandi. Nefndin fylgist með framvindu náms, einkum meistaraprófsverkefnis. Sérstakur prófdómari skal ávallt leggja mat á lokaverkefni meistaranema ásamt meistaraprófsnefnd.
12. gr.
Kröfur til leiðbeinanda.
Leiðbeinandi meistaranema er að jafnaði kennari (lektor, dósent, prófessor) í viðkomandi grein. Ef leiðbeinandi er ekki fastráðinn kennari er nauðsynlegt að hann hafi sjálfur a.m.k. lokið meistaraprófi á fræðasviðinu. Leiðbeinendur meistaranema skulu vera viðurkenndir sérfræðingar á viðkomandi sviði.
III. KAFLI
Meistaranám við heimspekideild (M.A.).
13. gr.
Markmið.
Markmið M.A.-náms er að veita nemendum vísindalega þjálfun og búa þá m.a. undir kennslustörf á framhaldsskólastigi, vísindastörf af ýmsu tagi og doktorsnám ef því er að skipta.
14. gr.
Meðferð umsókna.
Umsóknum skal skilað til skrifstofu heimspekideildar. Umsókn skulu fylgja afrit af prófskírteinum og stutt greinargerð um áhugasvið nemanda. Deildarskrifstofa fer yfir og skráir umsóknir, athugar hvort tilskilin gögn fylgja og gengur eftir því sem á vantar, ef þörf krefur. Umsóknirnar fara síðan til afgreiðslu í viðkomandi skor, með athugasemdum ef ástæða þykir til. Skor getur lagt til við deildarráð að umsókn sé hafnað. Sé það gert skal rökstuðningur fylgja.
Deildarskrifstofa tilkynnir umsækjendum um niðurstöður skora og sendir Hugvísindastofnun og nemendaskrá upplýsingar um nýja framhaldsnema. Deildarskrifstofa varðveitir og heldur utan um öll námsferilsgögn framhaldsnema.
Afgreiðslu umsókna sem berast fyrir 15. febrúar (vegna innritunar á haustmisseri) skal vera lokið og þeim svarað fyrir 15. mars. Afgreiðslu umsókna sem berast fyrir 15. september (vegna innritunar á vormisseri) skal vera lokið og þeim svarað fyrir 15. október.
15. gr.
Inntökuskilyrði.
Stúdent sem lokið hefur B.A.-prófi frá Háskóla Íslands með fyrstu einkunn, B.S.-prófi eða samsvarandi prófi frá öðrum háskóla með jafngildi fyrstu einkunnar getur sótt um að innritast í nám til M.A.-prófs í heimspekideild.
Skorir geta veitt undanþágu frá kröfum um lágmarkseinkunn. Að jafnaði skal nemandi hafa lokið minnst 60e á B.A.-stigi í þeirri grein sem hann hyggst innritast í til meistaraprófs. Um nánari skilyrði vísast til námsskipunarreglna einstakra greina.
Ef stúdent ætlar að hefja meistaranám strax að loknu B.A.-prófi getur hann sótt um það áður en hann lýkur prófi, ef fyrir liggur staðfesting viðkomandi háskóladeildar um að hann muni væntanlega ljúka náminu með fullnægjandi árangri áður en meistaranámið hefst. Engum áfanga í meistaranámi má ljúka fyrr en inntökuskilyrðum hefur verið fullnægt til hlítar.
16. gr.
Einingafjöldi og tímalengd náms.
Nám til M.A.-prófs er 60e. Náminu má ljúka á tveimur árum en að jafnaði skal það ekki taka lengri tíma en þrjú og hálft ár (sjö misseri). Ljúki nemandi ekki námi á sjö misserum, getur hann sótt um undanþágu til skorar frá þessum tímamörkum. Sé undanþága veitt, ber nemanda að uppfylla þær kröfur sem þá eru í gildi um M.A.-nám þótt hann hafi hafið námið meðan aðrar reglur giltu.
17. gr.
Kröfur til aðalleiðbeinanda.
Aðalleiðbeinandi meistaranema er að jafnaði kennari (lektor, dósent, prófessor) í viðkomandi grein og skal hann vera umsjónarkennari hans. Aðalleiðbeinendur meistaranema skulu vera viðurkenndir sérfræðingar á viðkomandi sviði. Ef aðalleiðbeinandi er ekki fastráðinn kennari er nauðsynlegt að hann hafi sjálfur a.m.k. lokið meistaraprófi á fræðasviðinu.
Við upphaf náms skulu skor og framhaldsnemi hafa samráð um val á aðalleiðbeinanda. Nemandi ráðfærir sig við aðalleiðbeinanda um skipulag námsins, val námskeiða og annað sem tengist náminu. Aðalleiðbeinandi leiðbeinir stúdent í lokaverkefni
18. gr.
Meistaraprófsnefndir.
Við upphaf náms skal skor skipa meistaraprófsnefnd. Í henni skulu eiga sæti minnst tveir sérfróðir menn og er annar þeirra aðalleiðbeinandi. Nefndin fylgist með framvindu náms, einkum meistaraprófsritgerðar.
19. gr.
Tilhögun náms.
Til M.A.-prófs við heimspekideild er krafist minnst 30e í námskeiðum. Þessi námskeið, m.a. þverfagleg, geta verið af ýmsu tagi, svo sem fyrirlestrar, semínör, einstaklingsverkefni og lesnámskeið. Meistaranemi skal þó ekki taka fleiri en 10e í lesnámskeiðum og ekki fleiri en 5e í lesnámskeiðum hjá aðalleiðbeinanda nema að fengnu samþykki skorar.
Heimilt er að meta framhaldsnámskeið á B.A.-stigi til eininga á M.A.-stigi. B.A.-stigs námskeið skulu þó ekki metin að fullu (þ.e., 5e námskeið skal ekki meta hærra en til 3,5e) nema meistaranemi vinni aukaverkefni í tengslum við þau.
Vægi lokaverkefnis (M.A.-ritgerðar) skal vera á bilinu 15e - 30e. Æskilegt er að nemandi fái formlegt tækifæri til að kynna rannsóknaverkefni sitt á vegum skorar áður en hann lýkur námi, svo sem með munnlegri vörn. Um nánari ákvæði um samsetningu náms vísast til námsskipunarreglna einstakra greina.
20. gr.
Námsmat.
Um leið og ritgerð er lögð fram skal leggja fyrir meistaraprófsnefnd staðfest námsferilsyfirlit stúdents. Skrifstofa heimspekideildar og nemendaskrá sjá um frágang og staðfestingu námsferilsyfirlits.
21. gr.
Prófdómarar.
Sérstakur prófdómari skal ávallt leggja mat á lokaverkefni meistaranema ásamt meistaraprófsnefnd.
22. gr.
Lokafrágangur M.A.-ritgerðar og endanleg skil.
Ganga skal frá meistaraprófsritgerð í samræmi við viðurkenndar frágangsreglur á viðkomandi fræðasviði. Í lokagerð meistaraprófsritgerðar skal koma skýrt fram við hvaða deild Háskóla Íslands verkið var unnið, hvenær því var lokið, hver var leiðbeinandi og hverjir sátu í meistaraprófsnefnd. Ennfremur skal geta sjóða Háskóla Íslands sem styrktu verkefnið, ef því er að skipta.
Nemandi skal skila ritgerðinni fullfrágenginni í fimm eintökum til deildarskrifstofu. Skiladagar eru 15. ágúst, 1. desember og 15. apríl. Leiðbeinandi skilar einkunn fyrir 7. október, 14. janúar eða 1. júní.
Eitt eintak skal varðveitt hjá Hugvísindastofnun eða á bókasafni viðkomandi rannsóknastofnunar, tvö eintök á Háskólabókasafni, eitt fær aðalleiðbeinandi til eignar og fimmta eintakið fær nemandi aftur með athugasemdum.
IV. KAFLI
Doktorsnám við heimspekideild.
23. gr.
Doktorsnám við heimspekideild.
Við heimspekideild er unnt að stunda nám til doktorsprófs á fagsviðum þar sem skor og deildarráð meta að nauðsynleg aðstaða og sérþekking sé fyrir hendi. Markmið doktorsnáms er að veita doktorsnemum vísindalega þjálfun og búa þá undir vísindastörf, t.a.m. háskólakennslu eða sérfræðingsstörf hjá vísindalegum rannsóknastofnunum.
24. gr.
Meðferð umsókna og efni.
Umsóknum skal skilað til skrifstofu heimspekideildar. Umsókn skulu fylgja afrit af prófskírteinum og frumdrög að rannsóknaráætlun. Sé óskað eftir tilteknum leiðbeinanda þarf að fylgja samþykki hans til að taka leiðsögn að sér í samræmi við drög að áætlun. Hugvísindastofnun veitir aðstoð við gerð umsókna um styrki og námsaðstoð fyrir doktorsnema í samvinnu við rannsóknasvið Háskólans.
Skrifstofa heimspekideildar fer yfir og skráir umsóknir, athugar hvort tilskilin gögn fylgja og gengur eftir því sem á vantar. Umsóknirnar fara síðan til afgreiðslu í viðkomandi skor, með athugasemdum ef ástæða þykir til. Skor ber að hafa samráð við doktorsnema um val aðalleiðbeinanda. Skor getur hafnað umsókn ef rannsóknaráætlun umsækjanda þykir ófullnægjandi eða ef ekki er tiltækur sérfræðingur á viðkomandi rannsóknasviði. Sé umsókn hafnað skal rökstuðningur fylgja afgreiðslu. Afgreiðsla skorar er háð samþykki deildarráðs.
Afgreiðslu umsókna sem berast fyrir 15. febrúar (vegna innritunar á haustmisseri) skal vera lokið og þeim svarað fyrir 15. mars. Afgreiðslu umsókna sem berast fyrir 15. september (vegna innritunar á vormisseri) skal vera lokið og þeim svarað fyrir 15. október. Deildarskrifstofa svarar umsækjendum eftir að deildarráð hefur samþykkt afgreiðslu skorar, varðveitir umsóknargögn og námsferilsgögn doktorsnema og tilkynnir nemendaskrá um afgreiðsluna.
25. gr.
Inntökuskilyrði.
Stúdent sem hefur lokið M.A.-prófi með fyrstu einkunn eða samsvarandi prófi getur sótt um aðgang að doktorsnámi.
Stúdent sem hefur lokið M.A.-prófi eða öðru samsvarandi prófi í annarri grein, frá annarri deild Háskóla Íslands eða öðrum háskóla með jafngildi fyrstu einkunnar, getur sótt um aðgang að doktorsnámi við heimspekideild. Eins getur stúdent sem hefur stundað doktorsnám við annan háskóla sótt um aðgang að doktorsnámi við heimspekideild. Í slíkum tilvikum skal meta gögn um nám nemanda og rannsóknir. Skorti á að undirbúningur hans sé jafngildur þeim undirbúningi sem ofangreind próf eiga að tryggja, má gera frekari námskröfur eftir því sem ástæða þykir til.
Ef stúdent ætlar að hefja doktorsnám strax að loknu M.A.-prófi getur hann sótt um það áður en hann lýkur prófi, ef fyrir liggur staðfesting viðkomandi háskóladeildar um að hann muni væntanlega ljúka náminu með fullnægjandi árangri áður en doktorsnám hefst. En doktorsnám getur enginn hafið fyrr en inntökuskilyrðum hefur verið fullnægt til hlítar.
26. gr.
Einingafjöldi og tímalengd náms.
Doktorsnám er 120e og skiptist í tvo hluta, bóknám er svari til 20e og doktorsritgerð. Doktorsnám við heimspekideild getur að jafnaði ekki tekið skemmri tíma en fjögur ár að loknu M.A.-prófi eða sambærilegum undirbúningi. Námið skal ekki taka meira en sjö ár, en sé það af einhverjum ástæðum ekki hægt getur nemandi sótt til skorar um undanþágu. Sé undanþága veitt ber nemanda að uppfylla þær kröfur sem þá eru í gildi um doktorsnám þótt hann hafi hafið námið meðan aðrar reglur giltu.
27. gr.
Aðalleiðbeinandi.
Doktorsnemi skal frá upphafi náms hafa aðalleiðbeinanda úr hópi fastra kennara í viðkomandi grein. Hann skal vera úr hópi fastra kennara á viðkomandi fræðasviði og hafa lokið doktorsprófi eða jafngildi þess. Skipan hans er háð samþykki vísindanefndar heimspekideildar. Vísindanefnd getur samþykkt, að tillögu viðkomandi skorar, að aðalleiðbeinandi sé ekki úr hópi fastra kennara en hann sé fræðimaður með doktorspróf á fræðasviði doktorsverkefnis.
Ef aðalleiðbeinandi telur að doktorsnemi standi ekki við þau fyrirheit sem hann hefur gefið má hann segja af sér leiðsögn. Þá skal doktorsnemi finna sér annan aðalleiðbeinanda, ef unnt er, með samþykki skorar og vísindanefndar deildar. Eins skal farið að ef doktorsnemi kýs að skipta um aðalleiðbeinanda.
28. gr.
Doktorsnefnd.
Þegar umsókn doktorsnema hefur verið samþykkt skal vísindanefnd deildar skipa í doktorsnefnd, að höfðu samráði við hlutaðeigandi skor. Í doktorsnefnd sitja aðalleiðbeinandi og tveir til þrír fastir kennarar deildarinnar eða viðurkenndir sérfræðingar á fræðasviðinu. Þeir verða að hafa lokið doktorsprófi eða áunnið sér jafngildi þess. Að minnsta kosti einn doktorsnefndarmanna skal vera utan kennarahóps viðkomandi skorar.
Aðalleiðbeinandi fylgist með vinnu doktorsnema og veitir leiðsögn þangað til hann telur að ritgerð sé tilbúin til varnar. Hinir nefndarmennirnir taka þátt í því að prófa bóknámshluta, leggja mat á námsáætlanir, gera athugasemdir við drög að doktorsritgerð, taka þátt í handleiðslu þegar ástæða þykir til og samþykkja að ritgerð sé tilbúin til varnar. Doktorsnefnd kveður doktorsnema á sinn fund eftir því sem þurfa þykir á meðan á náminu stendur. Áður en til doktorsvarnar getur komið skilar doktorsnefnd rökstuddu áliti til deildarforseta um það hvort veita skuli doktorsnema kost á að leggja ritgerðina fram til doktorsvarnar.
29. gr.
Tilhögun náms, námsframvinda og námskröfur.
Í lok fyrsta námsárs gerir doktorsnemi, í samráði við aðalleiðbeinanda, nákvæma áætlun um rannsóknarefni, námshraða og dvöl erlendis. Áætlunin skal lögð fyrir doktorsnefnd, viðkomandi skor og vísindanefnd heimspekideildar. Samþykkt áætlun skal send skrifstofu heimspekideildar þar sem hún verður hluti af námsferilsskrá doktorsnema. Breytingar á námsáætlun eru háðar samþykki skorar og vísindanefndar deildarinnar. Skipti doktorsnemi um rannsóknarefni, skal ný áætlun lögð fyrir skor og vísindanefnd.
Bóknám til doktorsprófs getur doktorsnemi stundað við Háskóla Íslands eða við erlenda háskóla og fengið það metið. Lesnámskeið hjá aðalleiðbeinanda mega mest nema 10e. Að jafnaði skal bóknámi lokið eftir annað námsár.
Mjög æskilegt er að bóknám, þjálfun til rannsókna og efnisöflun fari að hluta fram við viðurkennda erlenda háskóla eða stofnanir og fari dvöl erlendis sem næst einu ári.
Leitast skal við að veita doktorsnemum tækifæri til kennslu við Háskóla Íslands.
30. gr.
Kröfur til doktorsritgerða.
Doktorsnemi lýkur rannsóknum sínum með því að semja ritgerð, að jafnaði um 80.000 - 130.000 orð. Í doktorsritgerð skal tekið til rannsóknar afmarkað og samstætt viðfangsefni og það kannað rækilega með vísindalegum aðferðum. Í upphafi skal gera grein fyrir viðfangsefninu, þeim spurningum sem bornar verða upp og rannsóknaraðferðinni. Niðurstöður verður að setja fram skýrt og aðgengilega. Ef rannsóknin greinist í afmarkaða hluta sem ekki eru að öllu samstæðir skal gera grein fyrir stöðu einstakra hluta rannsóknarinnar innan heildarinnar og tengja meginniðurstöður einstakra hluta saman á einum stað. Almenn krafa til doktorsritgerða er að þar sé fylgt viðurkenndum vísindalegum rannsóknaraðferðum og að þær séu sjálfstætt framlag til þekkingarsköpunar á fræðasviði sínu.
Ef hluti verkefnis til doktorsprófs er nákvæm úrvinnsla eða útgáfa frumheimilda eða efnissöfnun af einhverju tagi, t.d. textaútgáfa eða orðfræðilegt viðfangsefni, verður verkefnið alltaf að hafa almennan hluta sem lýtur venjulegum kröfum til doktorsritgerðar að umfangi undanskildu, enda sé hann sprottinn upp úr frumvinnunni og gefi henni fræðilega dýpt eða dragi af mikilvægum þáttum hennar almennar ályktanir.
Í hverri doktorsritgerð skal vera útdráttur (summary) á íslensku og erlendu máli.
Þegar doktorsnemi hefur lokið ritgerð sinni skal senda hana í fjórum eintökum til deildarforseta með rökstuddu áliti doktorsnefndar um að henni sé lokið.
31. gr.
Tengsl meistara- og doktorsnáms.
Námskeið í grunnnámi (B.A.-námi eða samsvarandi námi) geta ekki verið hluti af bóknámi doktorsnema. Ekki er heimilt að nota meistaraprófsritgerð sem uppistöðu í doktorsritgerð, en í ýmsum tilvikum getur verið æskilegt að halda áfram á sama eða svipuðu rannsóknasviði. Doktorsnema er heimilt að sækja námskeið á meistarastigi við Háskóla Íslands eða erlendan háskóla og fá þau metin sem hluta af bóknámi sínu, enda hafi þau ekki áður verið metin sem hluti af meistaranámi hans.
32. gr.
Dómnefnd og andmælendur.
Þegar doktorsritgerð hefur verið skilað til deildarforseta, skal hann leita ráða hjá viðkomandi skor um dómnefndarmenn og leggja síðan fram tillögu um þriggja manna dómnefnd í deildarráði. Aðalleiðbeinandi getur ekki átt sæti í dómnefnd, en annar doktorsnefndarmaður getur átt þar sæti. Þegar þess er kostur skal einn dómnefndarmaður vera kennari eða sérfræðingur við erlendan háskóla eða rannsóknastofnun. Ritgerðin skal dæmd og varin samkvæmt reglum Háskólans um doktorspróf. Ekki er heimilt að andmælendur við doktorsvörn hafi átt sæti í doktorsnefnd.
33. gr.
Mat á námsferli.
Um leið og doktorsritgerð er lögð fram skal leggja fram námsferilsyfirlit stúdents, sem skrifstofa heimspekideildar og nemendaskrá ganga frá og staðfesta.
34. gr.
Lokafrágangur doktorsritgerðar og endanleg skil.
Ganga skal frá doktorsritgerð í samræmi við viðurkenndar frágangsreglur á viðkomandi fræðasviði. Í ritgerðinni skal koma fram við hvaða deild Háskóla Íslands verkið var unnið, hvenær því var lokið, hver var leiðbeinandi og hverjir voru í doktorsnefnd. Ennfremur skal geta þeirra sjóða Háskóla Íslands sem styrktu verkefnið, ef því er að skipta.
Eigi síðar en fjórum vikum fyrir vörn skal skila 35 eintökum af doktorsritgerð á skrifstofu heimspekideildar, sem sér um að dreifa eintökum til kennara viðkomandi skorar, bókasafna rannsóknastofnana á fræðasviðinu og Landsbókasafns Íslands - Háskólabókasafns (10 eintök). Doktorsefni ber kostnað af prentun doktorsritgerðar.
35. gr.
Lærdómstitill.
Doktorspróf við heimspekideild veitir lærdómstitilinn doctor philosophiae (dr. phil.)
36. gr.
Gildistaka o.fl.
Reglur þessar sem samþykktar hafa verið af deildarfundi í heimspekideild og hlotið staðfestingu háskólaráðs, sbr. 2. mgr. 13. gr. laga nr. 41/1999 um Háskóla Íslands og 67. og 68. gr. sameiginlegra reglna fyrir Háskóla Íslands nr. 458/2000, öðlast þegar gildi. Jafnframt falla úr gildi reglur settar af háskólaráði þann 7. apríl 2000 um framhaldsnám í heimspekideild.
Auk birtingar í B-deild Stjórnartíðinda, sbr. 1. mgr. 20. gr. laga nr. 41/1999, skal birta reglur þessar í kafla heimspekideildar í kennsluskrá og á heimasíðu deildarinnar.
Háskóla Íslands, 16. desember 2002.
Páll Skúlason.