Nr. 125 28. janúar 2005
REGLUR
um úthlutun styrkveitinga úr tónlistarsjóði.
Hlutverk og skipulag.
1. gr.
Hlutverk tónlistarsjóðs er að efla íslenska tónlist og stuðla að kynningu á íslenskum tónlistarmönnum og tónsköpun þeirra. Fjárveitingar til tónlistarsjóðs eru ákveðnar í fjárlögum ár hvert. Sjóðurinn skiptist í tvær deildir, tónlistardeild og markaðs- og kynningardeild.
Tónlistardeild veitir styrki til almennrar tónlistarstarfsemi, svo sem:
a. tónlistarflutnings hvers konar,
b. tónlistarhópa,
c. tónlistarhátíða,
d. rannsókna og skráninga á tónlist,
e. varðveislu tónlistar,
f. annarrar tónlistarstarfsemi.
Markaðs- og kynningardeild veitir m.a. styrki til:
g. markaðssetningar og kynningarverkefna í tengslum við íslenska tónlist og tónlistarmenn innanlands og erlendis,
h. annarra verkefna, sem miða að kynningu á íslenskri tónlist og tónlistarmönnum innanlands og erlendis.
Menntamálaráðherra úthlutar styrkjum úr báðum deildum tónlistarsjóðs a.m.k. tvisvar á ári. Styrkjum skal úthlutað til ákveðinna verkefna og til ákveðins tíma hverju sinni.
Auglýsingar og umsóknir.
2. gr.
Menntamálaráðuneyti auglýsir eftir umsóknum um styrki úr tónlistarsjóði í dagblöðum eða með öðrum sannanlegum hætti. Í auglýsingu skulu koma fram upplýsingar um tilgang og hlutverk sjóðsins, helstu atriði sem litið er til við mat á umsóknum, um eyðublöð fyrir umsóknir og hvar þau sé að finna. Þá skal skilgreindur umsóknarfrestur og hvenær umsóknir verði afgreiddar.
3. gr.
Umsóknum skal skilað á umsóknareyðublaði tónlistarsjóðs og skulu bera greinilega með sér hvernig umsækjandi hyggst verja styrknum. Þeim skulu fylgja eftirtalin gögn og upplýsingar eftir því sem við á:
a. upplýsingar um umsækjanda eða umsækjendur, aðra þátttakendur og samstarfsaðila, ef einhverjir eru, og nafn þess sem annast samskipti við sjóðinn,
b. upplýsingar um starfsferil, faglegan og listrænan bakgrunn aðila verkefnisins,
c. lýsing á verkefninu, markmiðum þess og þýðingu fyrir umsækjanda og með tilliti til hlutverks sjóðsins,
d. verk- og tímaáætlun,
e. fjárhagsáætlun, þar sem fram koma m.a. upplýsingar um áætlaðan kostnað, tekjur, hlutdeild annarra í kostnaði við verkefnið og styrkfé sem verkefnið hefur hlotið eða hefur sótt um,
f. staðfest gögn frá samstarfsaðilum sem og önnur gögn til stuðnings umsókn.
Mat á umsóknum.
4. gr.
Tónlistarráð metur styrkhæfi umsókna og gerir tillögur til menntamálaráðherra um afgreiðslu þeirra. Menntamálaráðuneyti getur sett tónlistarráði ákveðna fresti í þessu skyni.
Mat á umsóknum skal einkum byggjast á eftirtöldum sjónarmiðum eftir því sem við á:
a. listrænu gildi og mikilvægi verkefnis fyrir almenna tónlistarstarfsemi og eflingu íslenskrar tónlistar;
b. gildi og mikilvægi verkefnis fyrir kynningu og markaðssetningu íslenskrar tónlistar;
c. að umsækjanda takist að ná þeim markmiðum sem verkefnið miðar að;
d. starfsferli, faglegum og/eða listrænum bakgrunni umsækjanda og annarra þátttakenda;
e. fjárhagsgrundvelli verkefnisins og/eða hvort umsækjandi hafi hlotið aðra styrki.
Hafi umsækjandi áður fengið styrk úr tónlistarsjóði þarf að liggja fyrir greinargerð hans um framkvæmd fyrra verkefnis og ráðstöfun styrkfjárins til að ný umsókn af hans hálfu komi til greina.
Að jafnaði er hvorki gert ráð fyrir styrkveitingum til rekstrar og umsýslu samtaka, fyrirtækja og stofnana, sem hljóta regluleg rekstrarframlög, né til verkefna og viðburða sem þegar hafa átt sér stað.
Við mat á umsóknum getur tónlistarráð leitað umsagnar fagaðila, þegar það telur þess þörf.
Ákvörðun um styrkveitingar og eftirlit.
5. gr.
Tónlistarráð gerir tillögu til menntamálaráðherra um úthlutun og ráðstöfun fjár úr tónlistarsjóði. Tillögur tónlistarráðs skulu vera skriflegar og geyma í stuttu máli almenna lýsingu á framkvæmd og málsmeðferð við tillögugerðina. Sérhverri umsókn skal fylgja stutt umsögn ásamt tillögu um afgreiðslu hennar.
6. gr.
Menntamálaráðherra tekur ákvörðun um styrkveitingar úr tónlistarsjóði á grundvelli tillagna tónlistarráðs. Ráðherra er heimilt að binda styrkveitingar skilyrðum er stuðla að eðlilegri framvindu þeirra verkefna sem styrkt eru. Í þeim tilvikum kemur styrkur ekki til greiðslu nema að uppfylltum þessum skilyrðum. Í því skyni er heimilt að krefja styrkþega um skýrslur um framvindu verkefnisins sem styrkt er. Lokagreiðsla styrkfjár kemur að jafnaði ekki til úthlutunar fyrr en greinargerð um verkefnið hefur borist ráðuneytinu.
Menntamálaráðuneyti tilkynnir umsækjendum skriflega um afgreiðslu umsókna þeirra. Umsækjendum um styrki til verkefna, sem fallist er á að styrkja, skal jafnframt tilkynnt um skilyrði sem styrkveiting er bundin, eftirlit sem henni fylgir og viðurlög, ef út af bregður.
Menntamálaráðuneyti annast greiðslu styrkja. Viðtaka styrkfjár felur í sér viðurkenningu á að styrkþegi fallist á þau skilyrði sem styrkveiting er bundin.
7. gr.
Verði brestur á að ráðist sé í verkefni, tefjist framkvæmd þess úr hófi eða komi önnur skilyrði sem styrkveiting kann að vera bundin ekki fram innan eðlilegra tímamarka, getur menntamálaráðuneytið tekið ákvörðun um að fella styrkveitingu niður.
Ef sýnt þykir að styrkfé hafi ekki verið eða verði ekki nýtt í þeim tilgangi sem ætlað var, getur menntamálaráðuneytið krafist þess að sjóðnum verði endurgreiddur styrkur í heild eða að hluta.
Áður en ákvörðun samkvæmt 1. eða 2. mgr. er tekin skal styrkþega gefinn kostur á að lýsa viðhorfi sínu til málsins.
Styrktímabil.
8. gr.
Styrkir úr tónlistarsjóði skulu veittir til ákveðinna verkefna og að jafnaði ekki lengur en til eins árs í senn. Menntamálaráðherra getur ákveðið, skv. tillögu tónlistarráðs að veita styrki eða vilyrði fyrir áframhaldandi styrkveitingum til verkefna sem taka til lengri tíma en eins árs.
Gildistaka.
9. gr.
Reglur þessar eru settar skv. heimild í 4. mgr. 1. gr. laga um tónlistarsjóð nr. 76/2004 og öðlast þegar gildi.
Menntamálaráðuneytinu, 28. janúar 2005.
Þorgerður Katrín Gunnarsdóttir.