Samningur um ljósritun og hliðstæða eftirgerð í skólum

I. Aðild
1. gr.

Aðilar samnings þessa eru annars vegar menntamálaráðuneytið og hins vegar Fjölís, hagsmunafélag samtaka sem koma fram fyrir hönd rétthafa að verkum er njóta höfundarréttarverndar sbr. 1. mgr. 15. gr. a í höfundalögum nr. 73/1972 með síðari breytingum.
II. Gildissvið og skilgreiningar
2. gr.

Samningurinn tekur til ljósritunar og annarrar hliðstæðrar eftirgerðar verka sem höfundarréttarverndar njóta og notuð eru við kennslu í grunnskólum, og við kennslu, rannsóknir, stjórnun og önnur störf í framhaldsskólum og háskólum. Listi yfir stofnanir sem samningurinn nær til eru í fylgiskjali A með samningi þessum.

Samningurinn nær ekki til námskeiða sem þessir skólar halda, ef innheimt eru námskeiðsgjöld sem standa að verulegu eða öllu leyti undir kostnaði við námskeiðin.


Afritun á glærur og skyggnur telst eftirgerð hliðstæð ljósritun í samningi þessum.

Samningurinn tekur ekki til fjölföldunar með öðrum hætti, svo sem með upptöku verka á hljóðrit, myndbönd eða kvikmyndir.

Samningur þessi tekur ekki til eintakagerðar, fjölföldunar eða neins konar birtingar á hugverkum í véllæsilegu formi. Aðilar munu vinna saman að því að finna lausnir á höfundarréttarlegum atriðum, þ.á.m. væntanlegu endurgjaldi vegna notkunar á birtum hugverkum í véllæsilegu formi í þeim stofnunum sem samningur þessi tekur til.

Samningur þessi tekur því aðeins til erlends efnis að Fjölís hafi aflað sér umboðs frá samtökum í viðkomandi landi til að fara með réttindi, sem samningur þessi tekur til hér á landi, enda njóti þau samtök viðurkenningar í heimalandi sínu og starfi innan IFRRO (International Federation of Reproduction Rights Organizations). Skrá um slík umboð Fjölís fylgir samningi þessum, merkt Fylgiskjal B. Fjölís hefur gögn til staðfestingar á umboði sínu fyrir erlenda rétthafa.
3. gr.

Samningur þessi tekur til útgefinna verka sbr. 2. gr. höfundalaga.
Með útgefnu verki er átt við útgefin rit s.s. bækur, tímarit, dagblöð, nótnahefti, landakort o.þ.h. svo og listaverk, ljósmyndir, leiksviðsverk, skrár og töflur, enda nýtur verkið verndar samkvæmt höfundalögum.

Hver einstakur höfundur getur þó lagt skriflegt bann við slíkri fjölföldun, sbr. 1. mgr. 15. gr. a höfundalaga og ber Fjölís þá jafnframt að tilkynna um þá ákvörðun til menntamálaráðuneytis og stofnana sem taldar eru upp í fylgiskjali A með samningnum.
4. gr.

Fjölföldun samkvæmt samningi þessum er eingöngu heimil til viðbótar og fyllingar öðru kennsluefni svo og venjulegum kennslubókum og að öðru leyti með þeim takmörkunum sem hér segir:

a. Aðeins má fjölfalda stutta þætti úr hverju útgefnu efni og 20% hið mesta, þó aldrei meira en 30 blaðsíður.
b. Fyrir hverja bekkjardeild má hver kennari aðeins fjölfalda af tilteknum hluta útgefið efni, sem nemur einu eintaki á hvern nemanda á kennsluári, auk nauðsynlegra eintaka fyrir hann sjálfan.
c. Fjölföldun er aðeins heimil til bráðabirgðanota og því ekki til geymslu í birgðum.
d. Samningurinn heimilar ekki fjölföldun sem talist getur útgáfa og gera skal útgáfusamning um. Fjölföldun efnis til dreifingar meðal almennings telst útgáfa og er því ekki leyfileg.

5. gr.

Með fjölfaldaðri blaðsíðu samkvæmt samningi þessum er átt við blaðsíðu af stærðinni A4. Sé fjölfaldað á stærri blaðsíðu en A4 reiknast hver byrjuð blaðsíða sem jafngildir síðu af stærðinni A4 sem heil fjölfölduð blaðsíða.

Hver nótnablaðsíða jafngildir samkvæmt samningi þessum fimm blaðsíðum, hver dagblaðssíða þremur blaðsíðum, hver ljóðasíða þremur blaðsíðum og hver síða leiksviðsverks tveimur blaðsíðum.

Ef texti fylgir nótum á sömu blaðsíðu er greitt sérstaklega fyrir textann eftir því sem við á.

Fyrir hverja mynd, teikningu eða uppdrátt er greitt sérstaklega til viðbótar greiðslu fyrir texta, sem á blaðsíðu er, enda sé ekki aðeins um myndatexta að ræða.

Nú eru tvær blaðsíður eða fleiri á ljósriti úr bók, tímariti eða sambærilegu verki og er þá greitt sérstaklega fyrir hverja síðu.

Með samningi þessum fylgir bókun um glærur og skyggnur
6. gr.

Við fjölföldun skal nota þau tæki sem til eru innan hlutaðeigandi skóla.

Fjölföldun utan skóla er einungis heimil ef tæknilegar aðstæður krefjast þess eða ef sá sem annast fjölföldunina hefur gildandi samning við Fjölís.
7. gr.

Menntamálaráðuneytið mun beina því til skóla skv. fylgiskjali A að í hvert skipti sem ljósrit er gert sé upplýst hvert sé heiti rits og jafnframt hver sé höfundur þess og útgefandi.





III. Endurgjald til Fjölís

8. gr.

Samkomulag er um að ríkissjóður greiði til Fjölís vegna ljósritunar í skólum, sbr. 1.mgr. 2 gr., sem hér segir:
Framangreindar fjárhæðir eru á verðlagi ársins 2000. Fjárhæðir taka sömu verðlagsbreytingum og almenn rekstrargjöld í fjárlögum.

Í framangreindum greiðslum felst endanlegt uppgjör á endurgjaldi frá og með 1. september 1996 sbr. II. kafla Samkomulags um ljósritun og hliðstæða eftirgerð í skólum frá 23. desember 1997 og 31. mars 1999.

Með samningi þessum fylgir sérstök bókun menntamálaráðuneytisins.
IV. Gildistími o.fl.

9. gr.

Samningur þessi gildir frá 1. september 1999 til 31. ágúst 2005.

Uppsögn samnings þessa skal berast hinum aðilanum eigi síðar en í marsmánuði 2005 og tekur uppsögnin gildi 1. september 2005. Samningurinn framlengist óbreyttur um eitt ár í senn nema annar samningsaðila segi honum skriflega upp með sex mánaða fyrirvara.

10. gr.

Í tengslum við breytingar á tilhögun námsefnisgerðar fyrir grunnskóla er menntamálaráðuneytinu heimilt að semja við Samband íslenskra sveitarfélaga um að taka yfir skyldur þess samkvæmt samningnum vegna grunnskóla í landinu.

Á samningstímanum skulu samningsaðilar leitast við að koma sér saman um breytt fyrirkomulag greiðslna í framhaldsskólum og háskólum er miða að því að einstakir skólar framkvæmi skyldur þess skólastigs samkvæmt samningi þessum.
11. gr.

Eftir 1. september 2004 getur hvor aðili um sig krafist þess að fram fari ný könnun í skólum. Könnunin taki til skipulagningar, gagnasöfnunar, flokkunar í verndað og óverndað efni og efnisflokkunar þ.m.t. eftir uppruna og löndum.

Aðilar skulu koma sér saman um verklýsingu fyrir könnunina eftir að hafa notið sérfræðiaðstoðar trúnaðarmanna sinna þar um. Aðilar skulu síðan velja sér aðila til að framkvæma könnunina og gera við hann samning um framkvæmdina og kostnað af henni.

Menntamálaráðuneytið greiði 60% kostnaðar við könnunina og Fjölís 40%.
VI. Gjalddagar

12. gr.

Gjalddagi þóknunar fyrir hvert ár er 15. mars ár hvert.

Eindagi er 30 dögum seinna. Verði dráttur á greiðslu fram yfir eindaga skal greiða dráttarvexti skv. 3. kafla vaxtalaga nr. 25/1987 með síðari breytingum, af þeirri fjárhæð frá gjalddaga til greiðsludags.

VII. Utanaðkomandi kröfur
13. gr.

Fjölís ábyrgist allar kröfur, sem kunna að koma frá handhöfum höfundarréttar, eða höfundarréttarsamtökum, sem standa utan Fjölís og réttmætt tilkall eiga til greiðslu fyrir ljósritun verndaðra rita í skólum. Fjölís skal ávaxta varasjóð sem stofnaður var skv. eldri samningi og tryggja að varasjóðurinn nemi aldrei lægri fjárhæð en 2 milljónir króna.

VIII. Kynning

14. gr.

Menntamálaráðuneytið skuldbindur sig til að kynna efni samnings þessa þeim stofnunum sem samningurinn nær til, þ.e. þá þætti hans sem lúta að því hvaða leyfi Fjölís veitir til eftirgerðar. Þetta skal gert eigi síðar en 4 mánuðum frá undirritun samningsins. Enn fremur að birta helstu reglur við hverja ljósritunarvél. Hafa skal samráð við Fjölís um framkvæmd kynningarinnar.




IX. Gerðardómur o.fl.

15. gr.

Rísi ágreiningur um gildi, túlkun og framkvæmd á samningi þessum, skulu aðilar leitast við að leysa ágreiningsefnið með samkomulagi. Takist aðilum það ekki skal leggja málið fyrir gerðardóm samkvæmt lögum um samningsbundna gerðardóma nr. 53/1989.

Gerðardómurinn skal skipaður einum gerðarmanni tilnefndum af menntamálaráðuneytinu, einum gerðarmanni tilnefndum af Fjölís og oddamanni, sem þessir gerðarmenn koma sér saman um, en hann skal jafnframt vera formaður gerðardómsins. Komi gerðarmenn sér ekki saman um oddamann, skal hann tilnefndur af dómstjóra Héraðsdóms Reykjavíkur.
16. gr.

Allar tilkynningar milli aðila samkvæmt samningi þessum skulu sendar með bréfi í pósti eða faxi. Viðtakendur tilkynninga eru:
A. Fjölís, Hallveigarstíg 1, 101 Reykjavík, símbréf 511 2213
B. Menntamálaráðuneytið, Sölvhólsgötu 4, 150 Reykjavík,



F.h. menntamálaráðuneytisins F.h. Fjölís

______________________________ _____________________________
Björn Bjarnason menntamálaráðherra Ragnar Aðalsteinsson
formaður

Samþykkur:

___________________________
Fjármálaráðherra
Geir H. Haarde




Vottar:

____________________________

____________________________



Til baka í allar tegundir