prentvæn útgáfa ID-Bókun 32

BÓKUN 32{1} 1)
UM FJÁRHAGSFYRIRKOMULAG VEGNA
FRAMKVÆMDAR 82. GR.



[1. gr.

Tilhögun við ákvörðun fjárframlags EFTA-ríkjanna fyrir hvert fjárhagsár (n)


1. Framkvæmdastjórn Evrópubandalaganna skal senda fastanefnd EFTA-ríkjanna eigi síðar en 31. janúar ár hvert (n–1) fjárhagsáætlun sem tekur til starfsemi sem koma á til framkvæmdar á þeim tíma sem eftir er af viðkomandi fjölára fjárhagsramma, ásamt áætlaðri fjárhagsskuldbindingu vegna þeirrar starfsemi.

2. Fastanefnd EFTA-ríkjanna skal senda framkvæmdastjórn Evrópubandalaganna eigi síðar en 15. febrúar árið (n–1) skrá um starfsemi á vegum Evrópubandalagsins sem EFTA-ríkin vilja að skráð verði, í fyrsta skipti, í EES-viðauka við drög að fjárlagafrumvarpi Evrópusambandsins fyrir fjárhagsárið (n). Skráin skal lögð fram með fyrirvara um nýjar tillögur sem Evrópubandalagið leggur fram á árinu (n–1) og um endanlega afstöðu EFTA-ríkjanna að því er varðar þátttöku í starfseminni.

3. Framkvæmdastjórn Evrópubandalaganna skal eigi síðar en 15. maí ár hvert (n–1) greina fastanefnd EFTA-ríkjanna frá afstöðu sinni að því er varðar beiðnir EFTA-ríkjanna um þátttöku í starfsemi á fjárhagsárinu (n) og láta fylgja eftirfarandi upplýsingar:
      a) Viðmiðunarfjárhæðir sem tilgreindar eru „í upplýsingaskyni“ sem fjárhags- og greiðsluskuldbinding á gjaldahlið í drögum að fjárlagafrumvarpi Evrópusambandsins vegna starfsemi sem EFTA-ríkin taka þátt í eða hafa lagt fram ósk um að taka þátt í og reiknaðar eru í samræmi við ákvæði 82. gr. samningsins.
      b) Áætlaðar fjárhæðir sem samsvara framlögum EFTA-ríkjanna og tilgreindar eru „í upplýsingaskyni“ á tekjuhlið í drögum að fjárlagafrumvarpi.
      Afstaða framkvæmdastjórnar Evrópubandalaganna skal sett fram með fyrirvara um hugsanlegt framhald á viðræðum um starfsemi sem hún hefur ekki fallist á að EFTA-ríkin taki þátt í.

4. Fari svo að fjárhæðirnar, sem um getur í 3. mgr., samræmist ekki ákvæðum 82. gr. samningsins er fastanefnd EFTA-ríkjanna heimilt að óska eftir leiðréttingu fyrir 1. júlí viðkomandi árs (n–1).

5. Fjárhæðirnar, sem um getur í 3. mgr., skulu leiðréttar þegar fjárlög Evrópusambandsins hafa verið samþykkt, að teknu fullu tilliti til ákvæða 82. gr. samningsins. Þessum leiðréttu fjárhæðum skal komið á framfæri við fastanefnd EFTA-ríkjanna án tafar.

6. Áður en 30 dagar eru liðnir frá birtingu fjárlaga Evrópusambandsins í Stjórnartíðindum Evrópusambandsins skulu formenn sameiginlegu EES-nefndarinnar staðfesta, með bréfaskiptum að frumkvæði framkvæmdastjórnar Evrópubandalaganna, að fjárhæðirnar, sem skráðar eru í EES-viðauka við fjárlög Evrópusambandsins, samræmist ákvæðum 82. gr. samningsins.

7. Fastanefnd EFTA-ríkjanna skal senda framkvæmdastjórn Evrópubandalaganna eigi síðar en 1. júní fjárhagsárið (n) upplýsingar um endanlega skiptingu fjárframlagsins milli EFTA-ríkjanna. Sú skipting er bindandi.
      Hafi þessar upplýsingar ekki komið fram 1. júní fjárhagsárið (n) gilda til bráðabirgða hundraðshlutföll skiptingarinnar sem notuð var árið (n–1). Leiðréttingar skulu gerðar í samræmi við málsmeðferðina sem lýst er í 4. gr.

8. Hafi sameiginlega EES-nefndin ekki tekið ákvörðun um þátttöku EFTA-ríkjanna í starfsemi sem skráð er í EES-viðauka við fjárlög Evrópusambandsins fyrir fjárhagsárið (n) í síðasta lagi 10. júlí fjárhagsárið (n), nema samið hafi verið um annan frest vegna sérstakra aðstæðna, eða berist ekki í síðasta lagi þann dag tilkynning um að stjórnskipulegum fyrirvara á slíkri ákvörðun hafi verið aflétt, skal þátttöku EFTA-ríkjanna í viðkomandi starfsemi frestað til ársins (n+1), nema samið sé um annað.

9. Eftir að þátttaka EFTA-ríkjanna í tiltekinni starfsemi hefur verið ákveðin á fjárhagsárinu (n) skulu fjárframlög EFTA-ríkjanna taka til allra greiðslna af viðkomandi fjárlagaliðum á því fjárhagsári, nema samið sé um annað.

2. gr.

Greiðsla á framlögum EFTA-ríkjanna


1. Framkvæmdastjórn Evrópubandalaganna skal á grundvelli EES-viðauka við fjárlög Evrópusambandsins, sem ákveðinn hefur verið í samræmi við ákvæði 6. og 7. mgr. 1. gr., senda út greiðslubeiðni fyrir hvert EFTA-ríki sem er reiknuð út samkvæmt greiðsluskuldbindingum og í samræmi við ákvæði 2. mgr. 71. gr. fjárhagsreglugerðarinnar (() Reglugerð ráðsins (EB, KBE) nr. 1605/2002 frá 25. júní 2002 um fjárhagsreglugerðina sem gildir um fjárlög Evrópubandalaganna (Stjtíð. EB L 248, 16.9.2002, bls. 1).).

2. Greiðslubeiðnin skal berast EFTA-ríkjunum eigi síðar en 15. ágúst fjárhagsárið (n) og skal hvert EFTA-ríki þar beðið að greiða fjárframlag sitt eigi síðar en 31. ágúst það ár (n).
      Hafi fjárlög Evrópusambandsins ekki verið samþykkt fyrir 10. júlí fjárhagsárið (n), eða daginn sem samið hefur verið um vegna sérstakra aðstæðna samkvæmt 8. mgr. 1. gr., skal óskað greiðslu á grundvelli viðmiðunarfjárhæðar sem fram kemur í drögum að fjárlagafrumvarpi. Leiðréttingar skulu gerðar í samræmi við málsmeðferðina sem lýst er í 4. gr.

3. Fjárframlögin skulu tilgreind og greidd í EUR.

4. Í þessu skyni skal hvert EFTA-ríki stofna fyrir hönd framkvæmdastjórnar Evrópubandalaganna reikning í EUR hjá ríkissjóði landsins eða hverri þeirri stofnun annarri sem ríkið tilnefnir í þessum tilgangi.

5. Verði dráttur á greiðslum inn á reikninginn, sem um getur í 4. mgr., ber hlutaðeigandi EFTA-ríki að greiða vexti sem Seðlabanki Evrópu notar vegna helstu endurfjármögnunar á sínum vegum, að viðbættu hálfu öðru prósentustigi. Miðað skal við gildandi vexti 1. júlí það ár samkvæmt birtingu í C-deild Stjórnartíðinda Evrópusambandsins.

3. gr.

Framkvæmdarskilyrði


1. Um nýtingu fjárskuldbindinga sem leiðir af þátttöku EFTA-ríkjanna fer eftir ákvæðum fjárhagsreglugerðarinnar.

2. Þegar um útboð er að ræða skal þátttaka heimil öllum aðildarríkjum EB svo og öllum EFTA-ríkjum að svo miklu leyti sem fjármögnunin er samkvæmt fjárlagaliðum sem byggjast á þátttöku EFTA-ríkjanna.

4. gr.

Jöfnun fjárframlags EFTA-ríkjanna með hliðsjón af framkvæmd


1. Fjárframlag EFTA-ríkjanna, sem ákveðið hefur verið fyrir hvern viðkomandi fjárlagalið í samræmi við ákvæði 82. gr. samningsins, skal haldast óbreytt allt viðkomandi fjárhagsár (n).

2. Þegar reikningum fyrir hvert fjárhagsár hefur verið lokað skal framkvæmdastjórn Evrópubandalaganna reikna fjárlaganiðurstöðu EFTA-ríkjanna í tengslum við gerð ársreiknings fyrir árið (n+1), að teknu tilliti til:
      a) greiðslna sem EFTA-ríkin hafa innt af hendi í samræmi við ákvæði 2. gr.,
      b) hlutar EFTA-ríkjanna í heildarnýtingu fjárveitinga samkvæmt fjárlagaliðum sem samþykkt hefur verið að EFTA-ríkin taki þátt í, og
      c) hvers kyns greiðslna á útgjöldum í tengslum við starfsemi Evrópubandalaganna sem EFTA-ríkin inna af hendi hvert um sig og greiðslna sem þau inna af hendi í fríðu (t.d. skrifstofukostnaður).

3. Fara skal með fé, sem innheimtist frá utanaðkomandi aðilum samkvæmt hverjum fjárlagalið sem samþykkt hefur verið að EFTA-ríkin taki þátt í, sem úthlutaðar tekjur á sama fjárlagalið í samræmi við staflið f) í 1. mgr. 18. gr. fjárhagsreglugerðarinnar.

4. Jöfnun fjárframlaga EFTA-ríkjanna fyrir fjárhagsárið (n) á grundvelli fjárlaganiðurstöðunnar skal fara fram í tengslum við greiðslubeiðnir vegna fjárhagsársins (n+2) og byggjast á endanlegri skiptingu milli EFTA-ríkjanna á árinu (n).

5. Sameiginlega EES-nefndin skal samþykkja viðbótarreglur um framkvæmd ákvæða 1. og 4. mgr. eftir því sem nauðsyn krefur. Þetta á einkum við um gjöld sem tengjast starfsemi Evrópubandalaganna og leggjast á EFTA-ríkin hvert um sig og greiðslur sem þau inna af hendi í fríðu.

5. gr.

Upplýsingar


1. Framkvæmdastjórn Evrópubandalaganna skal láta fastanefnd EFTA-ríkjanna í té í lok hvers ársfjórðungs útdrátt úr reikningsyfirliti sínu sem sýnir, bæði á tekju- og gjaldahlið, stöðu á framkvæmd áætlana og annarra aðgerða sem EFTA-ríkin taka þátt í að fjármagna.

2. Við lok fjárhagsársins (n) skal framkvæmdastjórn Evrópubandalaganna senda fastanefnd EFTA-ríkjanna gögn um áætlanir og aðrar aðgerðir sem EFTA-ríkin taka þátt í að fjármagna og koma fram í viðkomandi hefti ársreiknings sem gerður er í samræmi við ákvæði 126. og 127. gr. fjárhagsreglugerðarinnar.

3. Framkvæmdastjórn Evrópubandalaganna skal láta fastanefnd EFTA-ríkjanna í té aðrar upplýsingar um fjármál sem þau geta með réttu farið fram á vegna áætlana og annarra aðgerða sem þau taka þátt í að fjármagna.

6. gr.

Eftirlit


1. Um eftirlit með ákvörðunum og aðgengi að tekjum, sem og eftirlit með skuldbindingum og útgjaldaáætlun í samræmi við þátttöku EFTA-ríkjanna, fer eftir ákvæðum stofnsáttmála Evrópubandalagsins, fjárhagsreglugerðarinnar og viðeigandi reglugerða á þeim sviðum sem um getur í 76. og 78. gr. samningsins.

2. Endurskoðendur framkvæmdastjórnar Evrópubandalaganna og EFTA-ríkjanna skulu koma á viðeigandi tilhögun til þess að auðvelda eftirlit með tekjum og gjöldum sem tengjast þátttöku EFTA-ríkjanna í starfsemi Evrópubandalaganna í samræmi við ákvæði 1. mgr.

7. gr.

Upplýsingar um verga landsframleiðslu sem taka ber tillit til við útreikning á „hlutfallsstuðli“


Gögn um verga landsframleiðslu á markaðsvirði, sem um getur í 82. gr. samningsins, skulu vera hin sömu og birt eru sem niðurstaða af framkvæmd 76. gr. samningsins.]*)
*) Ákvörðun nr. 110/2008. (EES-viðbætir 79/1, 18.12.2008). Gildistaka: 6.11.2008.